बिबिसीका अनुसार, पछिल्ला वर्षहरूमा एआई प्रविधिको दुरुपयोगबारे गहिरो चिन्ता बढिरहेको बेला, ओपनएआईले चीनको एक सुरक्षा अभियानले बनाएको एआई-सञ्चालित निगरानी उपकरण पत्ता लगाएको छ। यस उपकरणले पश्चिमी देशहरूका सामाजिक सञ्जालहरूमा भएका चीनविरोधी पोस्टहरूलाई वास्तविक समयमा संकलन गर्ने काम गर्दछ।
ओपनएआईका अनुसन्धानकर्ताहरूका अनुसार, उक्त निगरानी उपकरण निर्माण गर्ने व्यक्तिहरूमध्ये कसैले ओपनएआईको प्रविधि प्रयोग गरी आफ्नो कम्प्युटर कोडमा देखिएका समस्याहरू समाधान गर्ने प्रयास गरेका थिए। यही कारण ओपनएआईले उक्त गतिविधिलाई “पियर रिभ्यू” नाम दिएको छ। ओपनएआईका प्रमुख अनुसन्धानकर्ता बेन निमोका अनुसार, यस प्रकारको एआई-सञ्चालित निगरानी उपकरण पत्ता लागेको यो पहिलो पटक हो।
यसबाहेक, ओपनएआईले अर्को एक चिनियाँ अभियान “स्पोन्सर्ड डिस्कन्टेन्ट” को पनि पहिचान गरेको छ। यस अभियान अन्तर्गत, चिनियाँ असन्तुष्टहरूलाई निशाना बनाउँदै अंग्रेजी भाषाका पोस्टहरू तयार पार्न ओपनएआईका प्रविधिहरूको प्रयोग गरिएको थियो। त्यस्तै, सोही समूहले अमेरिकी समाज र राजनीतिलाई लक्षित गर्दै लेखहरू स्पेनिश भाषामा अनुवाद गरी ल्याटिन अमेरिकी देशहरूमा प्रचार गरेको पाइएको छ।
ओपनएआईका अनुसन्धानकर्ताहरूले क्याम्बोडियाबाट सञ्चालित अर्को अभियानसमेत पत्ता लगाएका छन्, जसमा “पिग बुचरिङ” नामक अनलाइन ठगीको लागि एआई-सञ्चालित प्रविधिको प्रयोग गरिएको थियो। यस योजनामा सामाजिक सञ्जालहरूमा आकर्षक टिप्पणीहरू लेखी पुरुषहरूलाई ठगी गर्ने कार्य भइरहेको थियो।
विशेषज्ञहरूका अनुसार, एआई प्रविधिले यस्ता अवैध गतिविधिहरूलाई सघाउन सक्छ, तर उही प्रविधिको सहायताले यस्ता कार्यहरू पहिचान गर्दै रोक्नसमेत सकिन्छ। ओपनएआईका अनुसन्धानकर्ताहरूले भनेका छन् कि चिनियाँ निगरानी उपकरण मेटाको एलएलएमए प्रविधिमा आधारित छ, जुन खुला स्रोत प्रविधि हो र विश्वभरिका विकासकर्ताहरूलाई उपलब्ध छ।
एआई प्रविधिको विकाससँगै यसका फाइदाहरू मात्र होइन, दुरुपयोगका सम्भावनाहरू पनि बढिरहेका छन्। विज्ञहरूले नियमनको आवश्यकतामा जोड दिँदै एआईको प्रयोगलाई व्यवस्थित गर्नुपर्ने बताइरहेका छन्।
