बिबिसीका अनुसार
अमेरिकी राष्ट्रपति डोनाल्ड ट्रम्पले टिकटक प्रतिबन्धलाई अस्थायी रूपमा स्थगित गरेपछि चिनियाँ स्वामित्वमा रहेको सोसल मिडिया एप टिकटक पुनः एप्पल र गुगलको अमेरिकी एप स्टोरमा फर्किएको छ। राष्ट्रपति ट्रम्पको यो निर्णयले टिकटकका करोडौं अमेरिकी प्रयोगकर्तालाई राहत मिलेको छ।
गत महिना केही समयको लागि अमेरिकी एप स्टोरहरूबाट हटाइएको टिकटक जनवरी १९ देखि लागू हुने नयाँ कानुनका कारण संकटमा परेको थियो। उक्त कानुनले टिकटकको मालिक कम्पनी बाइटडान्सलाई अमेरिकी राष्ट्रिय सुरक्षाका कारण देखाउँदै आफ्ना अमेरिकी सम्पत्ति बिक्री गर्न वा पूर्णरूपमा प्रतिबन्धको सामना गर्न निर्देशन दिएको थियो।
राष्ट्रपति ट्रम्पले उक्त प्रतिबन्धको कार्यान्वयन ७५ दिनका लागि स्थगित गर्ने कार्यकारी आदेशमा हस्ताक्षर गरेपछि टिकटक अमेरिकी बजारमा पुनः फर्कन सफल भएको हो। तर, एप पुनः उपलब्ध भए पनि गुगल र एप्पलले तत्कालै अमेरिकी एप स्टोरहरूमा सूचीबद्ध नगरेको बताइएको छ।
टिकटक, जुन अमेरिका भरि दोस्रो सर्वाधिक डाउनलोड गरिएको एप हो, ले हालै पुष्टि गर्दै आफ्नो नयाँ संस्करण डाउनलोडको लागि उपलब्ध गराइएको जनाएको छ। बजार अनुसन्धान संस्था सेन्सर टावरका अनुसार, २०२४ मा मात्र अमेरिकामा टिकटक ५२ मिलियन पटक डाउनलोड गरिएको थियो। तीमध्ये ५२ प्रतिशत डाउनलोड एप्पल एप स्टोरबाट तथा ४८ प्रतिशत गुगल प्ले स्टोरबाट भएको बताइएको छ।
टिकटकको भविष्य अझै अन्योलमै रहेको छ, किनकि अमेरिकी सरकारले चिनियाँ स्वामित्वका एपहरूमाथि कडा नीति अवलम्बन गर्ने सङ्केत दिएको छ। गत वर्ष अमेरिकी राष्ट्रपति जो बाइडेनले उक्त कानुनमा हस्ताक्षर गरेका थिए, जसले सरकारलाई चिनियाँ स्वामित्वका अन्य एपहरूमाथि समेत प्रतिबन्ध लगाउने वा बिक्री गराउने व्यापक अधिकार प्रदान गर्दछ।
यसैबीच, टिकटकको स्वामित्व खरिद गर्न विभिन्न सम्भावित लगानीकर्ताहरू आकर्षित भएका छन्। विशेष रूपमा, पूर्व लस एन्जलस डजर्सका मालिक फ्र्याङ्क मक्कोर्टलगायतका लगानीकर्ताहरूले टिकटक खरिद गर्ने इच्छाहरू प्रकट गरेका छन्। विश्लेषकहरूको अनुमानअनुसार, टिकटकको अमेरिकी व्यवसायको मूल्य करिब ५० अर्ब डलर पुग्न सक्नेछ।
राष्ट्रपति ट्रम्पले हालैको सम्बोधनमा टिकटकको भविष्यबारे फेब्रुअरीमा निर्णय लिइने संकेत गरेका छन्। उनले टिकटकको खरिदबारे विभिन्न व्यक्तिहरूसँग छलफल भइरहेको र आवश्यक परेमा ७५ दिने अवधि थप्न सकिने बताएका छन्।
