बीबीसीका अनुसार, ताइवानको परम्परागत चिप उद्योग अहिले गम्भीर दबाबमा परेको छ। पछिल्लो समय चीनले आफ्नो चिप उत्पादन क्षमतामा तीव्र वृद्धि गरिरहेकाले ताइवानका कम्पनीहरू नयाँ रणनीति अपनाउने प्रयासमा छन्।
सन् २०१५ मा ताइवानको पावरचिप टेक्नोलोजीले चीनको हेफेइ सहरसँग सम्झौता गर्दै नयाँ चिप कारखाना स्थापना गर्यो। तर नौ वर्षपछि यही कारखाना, नेक्सचिप, अहिले पावरचिपकै लागि प्रमुख प्रतिस्पर्धी बनेको छ। चीन सरकारले आफ्नै उत्पादनलाई प्राथमिकता दिँदा पावरचिपले चिनियाँ ग्राहक गुमाएको छ।
विकसित देशहरूले उन्नत चिप उत्पादनमा जोड दिइरहेका बेला चीन परम्परागत चिप उद्योगमा हावी भइरहेको छ। अमेरिकी प्रतिबन्धका कारण चीन उच्चस्तरीय चिप प्रविधिमा सीमित रहे पनि सरकारले ठूलो लगानी गर्दै परम्परागत चिप उत्पादनमा ध्यान केन्द्रित गरिरहेको छ।
सन् २०२४ मा परम्परागत चिप उत्पादनमा ताइवानको बजार हिस्सेदारी ४३% थियो भने चीनको ३४%। तर, आगामी तीन वर्षमा चीनको हिस्सेदारी ताइवानभन्दा माथि पुग्ने प्रक्षेपण गरिएको छ। ताइवानका उद्योगपतिहरू अब परम्परागत चिप उत्पादनबाट नयाँ प्रविधिमा रूपान्तरण हुने प्रयास गरिरहेका छन्। पावरचिपले डिस्प्ले ड्राइभर र सेन्सर चिप उत्पादन घटाउने योजना बनाएको छ।
तर, चिनियाँ उत्पादन सस्तो भएको कारण ग्राहकहरू चीनमै झुकिरहेका छन्। चीनले आक्रामक मूल्य रणनीति अपनाएर बजार कब्जा गर्न खोजेपछि ताइवानका फाउन्ड्रीहरूले नयाँ प्रविधि तथा विशेष खालका उत्पादनहरूमा ध्यान दिन थालेका छन्।
यसबीच, अमेरिकी पूर्वराष्ट्रपति डोनाल्ड ट्रम्पले विदेशी चिप उत्पादनमा १००% सम्मको कर लगाउने बताएका छन्। यस्तो कदमले ताइवानलगायत अन्य देशका चिप उत्पादकहरूलाई झनै चुनौती थप्ने देखिएको छ।
केही कम्पनीहरूले भने चीनबाहिर चिप उत्पादन गर्न खोजिरहेका छन्। चिनियाँ ग्राहकहरूले स्थानीय आपूर्ति श्रृंखलालाई प्राथमिकता दिन थालेपछि अन्तर्राष्ट्रिय ग्राहकहरूले ‘मेड इन चाइना’ ट्यागबिनाको चिप खोजिरहेका छन्।
हालैका घटनाक्रमले ताइवानका चिप कम्पनीहरूलाई नयाँ रणनीतिमा जान बाध्य पारेको छ। तर, चिनियाँ सरकारले प्रविधि क्षेत्रलाई निरन्तर सघाइरहेकाले आगामी दिनमा प्रतिस्पर्धा झनै कडा हुने देखिन्छ।
